ທີ່ນະຄອນຫຼວງວຽງຈັນ - ວັນທີ 20 ມີນາ ນີ້ບໍລິສັດ ໂຕໂຢຕ້າ ລາວ ຈໍາກັດ ໄດ້ຈັດໃຫ້ມີ ພິທີມອບ - ຮັບລາງວັນ ລະດັບປະເທດຈາກ ໂຄງການປະກວດແຕ້ມຮູບໃນຫົວຂໍ້ “ລົດໂຕໂຍຕ້າ ໃນຝັນຂອງຂ້ອຍ” ປະຈຳປີ 2019 ຂຶ້ນ ເພື່ອເປັນການສົ່ງເສີມ ການສຶກສາໃຫ້ກັບເຍົາວະຊົນລາວ ໂດຍການເຂົ້າຮ່ວມເປັນປະທານຂອງ ທ່ານ ປອ ຄຳຜາຍ ສີສະຫວັນ ຮອງລັດຖະມົນຕີກະຊວງສຶກສາທິການ ແລະ ກິລາ ແລະ ທ່ານ ມາຊາອະກິ ຄາວາບາຕະ ອໍານວຍການ ບໍລິສັດ ໂຕໂຢຕ້າ ລາວ ຈຳກັດພ້ອມດ້ວຍຕົວແທນຈຳໜ່າຍໂຕໂຢຕ້າຢ່າງເປັນທາງການ ໃນ ສປປ ລາວຄະນະກຳມະການຜູ້ຊົງວຸດທິ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ໂຄງການປະກວດແຕ້ມຮູບໃນຫົວຂໍ້ “ລົດໂຕໂຢຕ້າ ໃນຝັນຂອງຂ້ອຍ” ແມ່ນໄດ້ຈັດຂຶ້ນທີ່ປະເທດລາວເປັນປີທີ 9 ແລະ ຄັ້ງທີ 13 ໃນລະດັບສາກົນ ເຊິ່ງໃນປີ 2019 ນີ້ໄດ້ຈັດຂຶ້ນຢ່າງຍິ່ງໃຫຍ່ ດ້ວຍການເປີດກວ້າງການປະກວດຂຶ້ນທົ່ວປະເທດ ໂດຍໄດ້ຮັບຄວາມສົນໃຈຈາກເຍົາວະຊົນ ແລະ ພໍ່ແມ່ຜູ້ປົກຄອງເປັນຈຳນວນຫຼາຍ ແລະ ມີຍອດລວມຜູ້ສະໝັກທັງໝົດຈາກ 19 ແຂວງເຖິງ 3,695 ຄົນໂດຍໄດ້ຮັບກຽດເປັນຄະນະກໍາມະການຈາກພາກສ່ວນ ກົມວິຈິດສີນແຫ່ງຊາດ ເພື່ອມາຄັດເລືອກຮູບແຕ້ມຈົນໄດ້ຜູ້ຊະນະເລີດໃນແຕ່ລະປະເພດອາຍຸ ມາຮັບລາງວັນໂດຍນ້ອງໆເຍົາວະຊົນຜູ້ຊະນະເລີດຈະໄດ້ຮັບ ທຶນການສຶກສາຂັນລາງວັນໃບປະກາດຊະນີຍະບັດ


ນອກຈາກນີ້ ຜົນງານຂອງຜູ້ທີ່ໄດ້ຮັບລາງວັນຊະນະເລີດອັນດັບທີ 1, 2, 3 ໃນແຕ່ລະປະເພດອາຍຸ ໄດ້ຖືກສົ່ງເຂົ້າຮ່ວມປະກວດ ໃນລະດັບໂລກທີ່ປະເທດຢີ່ປຸ່ນ ຊຶ່ງຈະໄດ້ປະກາດລາງວັນໃນເດືອນ ກໍລະກົດ 2019 ນີ້ແລະ ຫາກຜົນງານຜ່ານຕິດອັນດັບ1ໃນກໍ່ຈະໄດ້ເດີນທາງໄປຮັບເອົາລາງວັນ ດ້ວຍຕົວເອງທີ່ປະເທດຍີ່ປຸ່ນ ອີກດ້ວຍເຊີ່ງໃນປີນີ້ ເຍົາວະຊົນລາວເຮົາ ຈະສາມາດຍາດ ມາໄດ້ລາງວັນໃດບໍ່ນັ້ນ ຂໍໃຫ້ພີ່ນ້ອງຊາວລາວເຮົາຊ່ວຍຮ່ວມສົ່ງແຮງໃຈເຊຍນ້ອງໆດ້ວຍ.


ທ່ານ ມາຊາອະກິ ຄາວາບາຕະ ອໍານວຍການ ບໍລິສັດ ໂຕໂຢຕ້າ ລາວ ຈຳກັດກ່າວວ່າ “ຂຶ້ນໂຄງການ Toyota Dream Car Art Contest ນີ້ເປັນສ່ວນໜຶ່ງຂອງນະໂຍບາຍ “ໂຕໂຢຕ້າ ໄປໃສໄປນໍາກັນ” ທີ່ເຮົາສະໜັບສະໜູນສັງຄົມລາວໃນດ້ານການສຶກສາມາໂດຍຕະຫຼອດ ເຮົາເລີ່ມໂຄງການນີ້ແຕ່ປີ 2011 ປີນີ້ເປັນປີທີ່ເຮົາໄດ້ຜົນງານຫຼາຍ ເຖິງ 3,695 ຜົນງານ ເຊິ່ງເຮົາຕ້ອງຂໍຂອບໃຈ ກະຊວງສຶກສາທິການ ແລະ ກິລາ ແລະ ພາກສ່ວນຕ່າງໆ ທີ່ກ່ຽວຂ້ອງໃນການສະໜັບສະໜູນໂຄງການນີ້ ບໍ່ວ່າຈະເປັນການປະຊາສໍາພັນ ຫຼື ການພັກດັນໃຫ້ໂຄງການນີ້ ໄປຢູ່ໃນວິຊາຫັດຖະກຳ ເຊິ່ງເຮັດໃຫ້ນ້ອງໆໄດ້ມີໂອກາດໃນການແຕ້ມຮູບຫຼາຍຂຶ້ນ ຈາກທີ່ເຫັນຜົນງານຂອງນ້ອງໆ ໃນມື້ນີ້ກໍ່ຮູ້ສຶກດີໃຈຫຼາຍ ນ້ອງໆມີຄວາມສາມາດຫຼາຍ ແລະ ກໍ່ຂໍເປັນກໍາລັງໃຈໃຫ້ນ້ອງໆ ໃຫ້ໄດ້ຊະນະໃນລະດັບສາກົນ ເພື່ອສ້າງຊື່ສຽງໃຫ້ກັບ ສປປ ລາວ ອີກຄັ້ງ.