ບໍລິສັດ ໂຕໂຢຕ້າ ລາວ ຈໍາກັດ ແລະ ບໍລິສັດ ໂຕໂຢຕ້າ ມໍເຕີ້ ປະເທດໄທ ຈຳກັດ ໄດ້ຮ່ວມໂດຍສະເດັດພຣະຣາຊກຸສົນກະຖິນພຣະຣາຊ ທານປະຈຳປີ 2018 ທີ່ ວັດສີສະຫວ່າງວົງ, ເມືອງໄຊຍະບູລີ, ແຂວງໄຊຍະບູລີ, ສປປ ລາວ.

ວັນທີ 17-18 ພະຈິກ 2018 ບໍລິສັດ ໂຕໂຢຕ້າ ລາວ ຈໍາກັດ ນໍາໂດຍ ທ່ານ ມາຊາອະກີ ຄາວາບະຕະ ຜູ້ອໍານວຍການ ບໍລິສັດ ໂຕໂຢຕ້າ ມໍເຕີ້ ປະເທດໄທ ຈຳກັດ ນໍາໂດຍ ທ່ານ ຈັກກຣິນ ຊົນນະທີທອນ ອຳນວຍການ ສຳນັກງານໂຄງການເຂດພູມິພາກແມ່ນ້ຳຂອງ ພ້ອມດ້ວຍ ສະມາຄົມມິດຕະພາບໄທ-ລາວ, ສະມາຄົມມິດຕະພາບລາວ-ໄທ ແລະ ພາກສ່ວນທີ່ກ່ຽວຂ້ອງພາຍໃນແຂວງໄຊຍະບູລີ, ໄດ້ຮ່ວມກັນຈັດຕັ້ງ ບຸນກະຖິນມະຫາສາມັກຄີພະຣາຊະທານຈາກເຈົ້າມະຫາຊີວິດແຫ່ງຣາຊະອານາຈັກໄທ ພະບາດສົມເດັດມະຫາວະຊິຣາລົງກອນ ບໍດິນທໍຣະເທບວະຣາງກູນ ທີ່ ວັດສີສະຫວ່າງວົງ, ເມືອງໄຊຍະບູລີ, ແຂວງໄຊຍະບູລີເພື່ອນຳໄປໃຊ້ເປັນທຶນໃນການພັດທະນາພາຍໃນວັດ. ແລະໃນວັນດຽວກັນນີ້ ທາງ ບໍລິສັດ ໂຕໂຢຕ້າ ລາວ ຈຳກັດ ຮ່ວມກັບ ບໍລິສັດ ໂຕໂຢຕ້າ ມໍເຕີ້ ປະເທດໄທ ຈຳກັດ ຍັງໄດ້ມີພິທີສົ່ງມອບອາຄານຫ້ອງນ້ຳຈຳນວນ 6 ຫ້ອງ ພ້ອມລະບົບໄຟຟ້າອາຄານຮຽນ ລວມມູນຄ່າທັງໝົດ 130,000,000 ກີບ ( 500,000 ບາດ )ໃຫ້ແກ່ ໂຮງຮຽນມັດທະຍົມສົມບູນສົງ ໂດຍມີ ທ່ານນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ເປັນຜູ້ຮັບມອບອາຄານ


ເຊິ່ງກິດຈະກຳການຕັ້ງກອງບຸນກະຖິນມະຫາສາມັກຄີໃນຄັ້ງນີ້ ຖືເປັນອີກກິດຈະກຳໜຶ່ງທີ່ ບໍລິສັດມີສ່ວນຮ່ວມມາໂດຍຕະຫຼອດເພື່ອສືບທອດປະເພນີອັນດີງາມຂອງຊາດລາວ. ນອກຈາກນີ້ ໂຕໂຢຕ້າ ຈະຍັງຄົງສະໜັບສະໜູນ ແລະ ດຳເນີນກິດຈະກຳຕ່າງໆທີ່ເປັນປະໂຫຍດຕໍ່ກັບສັງຄົມ, ການສຶກສາ ແລະ ວັດທະນະທຳຕ່າງໆຂອງຊາດລາວຕໍ່ໄປໃນອະນາຄົດ ຕາມນະໂຍບາຍ “ໂຕໂຢຕ້າ ໄປໄສໄປນຳກັນ”