ສຸດຍອດເຍົາວະຊົນລາວຄວ້າຫຼຽນຄຳລະດັບໂລກອັນດັບ 1 ຈາກໂຄງການແຕ້ມຮູບ “ລົດໂຕໂຍຕ້າໃນຝັນຂອງຂ້ອຍ 2018

ຊົມເຊີຍຢ່າງຍິ່ງສຳລັບສຸດຍອດເຍົາວະຊົນລາວ ນາງ ສຸກສະຫວັນ ມະນີວົງໄຊ, ໂຮງຮຽນມັດທະຍົມສົມບູນເພຍວັດ ຕົວແທນຈາກ ສປປ ລາວ ຈາກລຸ້ນອາຍຸ 12-15 ປີ  ເຈົ້າຂອງຜົນງານທີ່ມີຊື່ວ່່າ “ລົດສະຖາປັດຕະຍະກຳແລະປະຫວັດສາດ” ຈາກການຄັດເລືອກຫຼາຍກວ່າ 650,000 ຜົນງານ ຈາກ 76 ປະເທດທົ່ວໂລກ ທີ່ສາມາດຄວ້າໄດ້ຫຼຽນຄໍາລະດັບໂລກຄັ້ງທໍາອິດຂອງ ສປປ ລາວ ຈາກໂຄງການແຕ້ມຮູບ “ລົດໂຕໂຢຕ້າໃນຝັນຂອງຂ້ອຍ 2018” (Toyota Dream Car Art Contest 2018) ທີ່ມີການປະກາດແລະຮັບລາງວັນຈາກ Toyota Motor Corporation ປະເທດຍີ່ປຸ່ນ ໃນວັນທີ 29 ສິງຫາ 2018 ທີ່ Mega Web , Toyota City Showcase ປະເທດຍີ່ປຸ່ນ.

ຂໍສະແດງຄວາມຍິນດີນຳ ນາງ ສຸກສະຫວັນ ມະນີວົງໄຊ ແລະ ຄອບຄົວ ທີ່ເຮັດໃຫ້ໂລກໄດ້ເຫັນເຖິງ ຄວາມສາມາດຂອງເຍົາວະຊົນລາວ. ໂຕໂຢຕ້າ ຫວັງເປັນຢ່າງຍິ່ງວ່າຈະສາມາດເປັນສ່ວນຫນຶ່ງ ໃນການປະກອບສ່ວນສ້າງສາພັດທະນາເຍົາວະຊົນລາວໃຫ້ກາຍເປັນອານາຄົດທີ່ດີຂອງຊາດຕໍ່ໄປ.

ນອກຈາກການເດີນທາງໄປຮ່ວມຮັບລາງວັນແລ້ວ ໃນວັນທີ 28 ສິງຫາ 2018 ນາງ ສຸກສະຫວັນ ມະນີວົງໄຊ ພ້ອມຜູ້ປົກຄອງແລະນ້ອງໆຈາກປະເທດຕ່າງໆໄດ້ມີໂອກາດເຂົ້າໄປທັດສະນະສຶຶກສາທີ່ Toyota Kaikan Museum ຫຼື ພິພິດຕະພັນລົດໂຕໂຢຕ້າ ເຊິ່ງຈັດສະແດງລົດ ແລະ ເທັກໂນໂລຢີໃໝ່ໆ ທີ່ຊ່ວຍປະຢັດພະລັງງານ ແລະຮັກສາສິ່ງແວດລ້ອມ. ຈາກນັ້ນກໍ່ໄດ້ໄປຢ້ຽມຊົມໂຮງງານໂຕໂຢຕ້າ Motomachi ເຊິ່ງໄດ້ເບິ່ງຂັ້ນຕອນການຜະລິດທັງໝົດ ເພື່ອໃຫ້ເຫັນໄດ້ວ່າກວ່າຈະຜະລິດລົດອອກມາ 1 ຄັນນັ້ນ ຕ້ອງຜ່ານຂັ້ນຕອນແນວໃດ. ເຊິ່ງນ້ອງໆກໍ່ຕ່າງຕື່ນເຕັ້ນກັບເທັກໂນໂລຢີແລະເຄື່ອງມືທີ່ທັນສະໃໝ ໃນໂຮງງານ. ນອກຈາກນັ້ນນ້ອງໆຍັງໄດ້ໄປທ່ຽວທີ່ Lego Land ແລະ Sea Life Aquarium ທີ່ເມືອງນາໂກຍ້າ ຈາກນັ້ນເດີນທາງເຂົ້າສູ່ໂຕກຽວດ້ວຍລົດໄຟຄວາມໄວສູງຊິນຄັນເຊັນ ແລະໄປຢ້ຽມຊົມ Mega Web, Toyota  City Showcase ພ້ອມທັງໄດ້ສຳຜັດປະສົບການທົດລອງຂັບລົດ ແລະໄດ້ໄປໄຫວ້ພະຂໍພອນທີ່ວັດອາຊາກຸຊະອີກດ້ວຍ.