ບໍລິສັດ ໂຕໂຢຕ້າ ລາວ ຈໍາກັດ ໄດ້ຈັດງານເປີດໂຕລົດໃຫຍ່ອະເນກປະສົງ ຟໍຈູນເນີ້ (Fortuner) ລຸ້ນໃໝ່ຫຼ້າສຸດ ເມື່ອວັນທີ 28 ສິງຫາ 2020 ຜ່ານມາ ທີ່ນະຄອນຫຼວງວຽງຈັນ ໂດຍເປັນການຈັດງານເປີດຕົວລົດຜ່ານທາງສື່ສັງຄົມອອນລາຍ.

 

 

ທ່ານ ມາຊາອາກິ ຄາວາບາຕະ ອໍານວຍການຂອງບໍລິສັດ ໂຕໂຢຕ້າ ລາວ ຈໍາກັດ ກ່າວວ່າ: ລົດໂຕໂຢຕ້າ ຟໍຈູນເນີ້ ລຸ້ນໃໝ່ເປັນລົດໃຫຍ່ອະເນກປະສົງທີ່ມີຄວາມສວຍງາມ, ຖືກອອກແບບ ແລະ ພັດທະນາດ້ວຍເຕັກໂນໂລຊີນະວັດຕະກຳໃໝ່ຂອງໂຕໂຢຕ້າໃຫ້ມີຄວາມສວຍງາມ, ທັນສະໄໝທັງພາຍນອກ ແລະ ພາຍໃນ ທີ່ມາພ້ອມກັບລະບົບຄວາມປອດໄພສູງສູດ ເພື່ອໃຫ້ມີຄວາມອຸ່ນໃຈ ແລະ ໝັ້ນໃຈທຸກຄັ້ງໃນທຸກການຂັບຂີ່.

 

 

ເວົ້າສະເພາະ ລົດໂຕໂຢຕ້າ ຟໍຈູນເນີ້ ລຸ້ນໃໝ່ນີ້ ໄດ້ມີການພັດທະນາປັບປຸງ 5 ຫົວຂໍ້ສໍາຄັນດັ່ງນີ້:
1). ດ້ານການອອກແບບໄດ້ຮັບການອອກແບບໃໝ່ໃຫ້ທັນສະໄໝຫຼາຍຂຶ້ນ ໃນນີ້ ຈຸດປ່ຽນພາຍນອກໄດ້ແກ່ຕາໄຟໜ້າ ແລະ ໄຟຫຼັງໄດ້ອອກແບບໃໝ່ເພີ່ມຄວາມໂດດເດັ່ນໃນຍາມກາງຄືນ, ກະຈັງໜ້າ, ກັນຊົນໜ້າ, ຂອບໄຟຕັດໝອກ, ລໍ້ຂອບ 18 ລາຍໃໝ່; ສ່ວນຈຸດປ່ຽນພາຍໃນ ມີແຜງໜ້າປັດອອກແບບໃໝ່ທີ່ທັນສະໄໝກວ່າເກົ່າພ້ອມຈໍສະແດງຜົນທີ່ສະແດງໃຫ້ເຫັນວົງລໍ້ເວລາໝູນພວງມະໄລ, ສະແດງລະບົບເຕືອນໜ້າຫຼັງ ແລະ ລະບົບຄວາມໄວຕ່າງໆ, ຈໍສະແດງຜົນຂະໜາດ 8 ນິ້ວ ພ້ອມເຄື່ອງສຽງໃໝ່ຄຸນນະພາບດີກວ່າເກົ່າສາມາດຮອງຮັບລະບົບ Apple Car Play, Android & iOS, Miracast ທີ່ເຊື່ອມຕໍ່ໄດ້ງ່າຍດາຍ.

 

 

2). ດ້ານສະມັດຖະນະການຂັບຂີ່ເພີ່ມແຮງມ້າ ແລະ ແຮງບິດຂຶ້ນ ໂດຍເພີ່ມແຮງມ້າ ຈາກ 177Ps ເປັນ 204Ps, ແຮງບິດ ຈາກ 450Nm ເປັນ 500Nm, ພວງມາໄລສຳພັດນຸ້ມນວນເປັນພວງມະໄລພາວເວີ້ ໂດຍນໍາໃຊ້ລະບົບ VFC ມາຊ່ວຍປັບນໍ້າໜັກຂອງພວງມະໄລໃຫ້ເໝາະສົມກັບຄວາມໄວຂອງລົດທຸກຊ່ວງໄລຍະ ເຊິ່ງນອກຈາກການຂັບຂີ່ທີ່ນຸ້ມນວນແລ້ວຍັງຊ່ວຍປະຢັດນໍ້າມັນຂຶ້ນຕື່ມອີກ.

 

 

3). ດ້ານປະສິດຕິພາບການໃຊ້ເຊື້ອເພິງປະຫຍັດນ້ຳມັນຂຶ້ນ 4% ຈາກລຸ້ນປັດຈຸບັນ.

 

 

4). ດ້ານຄວາມສະດວກສະບາຍປັບປຸງເຄື່ອງສຽງອອກແບບໃໝ່ຫນ້າຈໍສໍາພັດ 8 ນິ້ວ, ເຊື່ອມຕໍ່ວ່ອງໄວດ້ວຍລະບົບ Apple Car Play, Android & iOS ແລະ Miracast, ຫ້ອງໂດຍສານພາຍໃນທີ່ໂອ່ໂຖງກວ້າງຂວາງສະດວກສະບາຍຫຼາຍຂຶ້ນ.

 

 

5). ດ້ານຄວາມປອດໄພມີລະບົບເຊັນເຊີ້ 06 ຈຸດ: ໜ້າ 2 ຫລັງ 4, ແຈ້ງເຕືອນດ້ວຍສຽງ, ແຈ້ງເຕືອນໃນຫນ້າຈໍດ້ານກາງ, ລະບົບຊ່ວຍປ້ອງກັນການອອກລົດຜິດວິທີ ຫຼື ເອີ້ນວ່າ Drive Start Control ຊຶ່ງຈະຊ່ວຍໃຫ້ຜູ້ຂັບຂີ່ ຫມັ້ນໃຈໃນຄວາມປອດໄພ ກໍລະນີອອກລົດຜິດວິທີ ຫຼື ຢຽບຄັນເລັ່ງແຮງຜິດປົກກະຕິໃນເວລາຖອຍ ຫຼື ອອກໂຕໃນ ມູມແຄບເຊິ່ງອາດເກີດອຸບັດເຫດໄດ້, ແຕ່ລະບົບ DSC ຈະຊ່ວຍດຶງແຮງຈັກລົງ ແລະ ຊ່ວຍໃນການເບກຂອງລົດ ໂດຍບໍ່ກໍ່ໃຫ້ເກີດການຕໍາໄດ້.

 

 

ພາຍໃນງານດັ່ງກ່າວ, ຍັງມີການເປີດໂຕຮູບເງົາຄັ້ງທຳອິດຂອງໂຕໂຢຕ້າໃນລາວເພື່ອມອບຄວາມບັນເທີງໃຫ້ທຸກຄົນໃນຊ່ວງການຄວບຄຸມການແຜ່ລະບາດຂອງເຊື້ອພະຍາດໂຄວິດ-19 ໂດຍຮູບເງົານີ້ເປັນຮູບເງົາສັ້ນທີ່ມີຄວາມມ່ວນ ຊື່ນຕື່ນເຕັ້ນເພື່ອ “ປຸກພະລັງໃນຕົວທ່ານ ສູ່ເປ້າໝາຍທີ່ເໜືອກວ່າ” ແລະ “ ໃຫ້ຊີວິດທີ່ເໜືອລະດັບ” ສຳລັບທ່ານ.