“ ບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ໄດ້ມອບທຶນເພື່ອກໍ່ສ້າງອາຄານອະເນກປະສົງ ໃຫ້ກັບໂຮງຮຽນມັດທະຍົມສົມບູນວຽງໄຊ ເມືອງວຽງໄຊ ແຂວງຫົວພັນ ”


ວັນທີ 26 ເມສາ 2017 ທີ່ຜ່ານມາ, ໄດ້ມີພິທີລົງນາມສັນຍາ ແລະເປີດໂຄງການກໍ່ສ້າງອາຄານ ອະເນກປະສົງ ໂຕໂຢຕ້າ ໃນໂຮງຮຽນມັດທະຍົມສົມບູນວຽງໄຊ ເມືອງວຽງໄຊ ແຂວງຫົວພັນ ເພື່ອມອບໃຫ້ກັບທາງໂຮງຮຽນ ໃຊ້ເປັນບ່ອນປະຊຸມ ຫຼື ເຮັດກິດຈະກໍາກິລາ ແລະການຈັດສະແດງສິລະປະຂອງນັກຮຽນ ໂດຍປະທານໃນພິທີ ຄື ທ່ານ ນົບພະດົນ ເທບພິທັກ ເອກອັກຄະລັດຖະທູດ ປະຈໍານະຄອນຫຼວງວຽງຈັນ ແລະ ທ່ານ ວັນໄຊ ແພງຊູມມາ ເຈົ້າແຂວງ ແຂວງຫົວພັນ ພ້ອມດ້ວຍ ທ່ານສຸວິດ ສິມະສະກຸນ ປະທານສະມາຄົມໄທ-ລາວ ເພື່ອມິດຕະພາບ, ທ່ານ ຫຽມ ພົມມະຈັນ ປະທານສະມາຄົມລາວ-ໄທ ເພື່ອມິດຕະພາບ ແລະ ທ່ານ ສະຫະຊາດ ກັງສະສິທຽມ ຜູ້ອໍານວຍການຝ່າຍປະຕິບັດການພູມີພາກແມ່ນໍ້າຂອງ 1 ຜູ້ແທນຂອງບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ລວມທັງໜ່ວຍງານຕ່າງໆທຸກພາກສ່ວນພາຍໃນເມືອງຫົວພັນ ໄດ້ເຂົ້າຮ່ວມພິທີ ແລະ ເປັນສັກຂີພະຍານ ຕັ້ງແຕ່ເວລາ 8:20 ເຖິງ 9:00 ໂມງ.


ໂຄງການດັງກ່າວ ມີມູນຄ່າປະມານ 2,100,000 ບາດ (493,500,000 ກີບ) ໂດຍບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ເປັນຜູ້ສະໜັບສະໜູນໂຄງການດັ່ງກ່າວທັງໝົດ ເຊິ່ງໄດ້ມີການຄັດເລືອກຜູ້ຮັບເໝົາ ແລະດໍາເນີນການໂດຍທາງແຂວງຫົວພັນ ເປັນຜູ້ຈັດຫາ ແລະທາງສະມາຄົມໄທ-ລາວ ເພື່ອມິດຕະພາບ ໄດ້ເປັນຜູ້ຈັດ ແລະດໍາເນີນການ ເຊິ່ງໃນພິທີການລົງນາມຄັ້ງນີ້ ທາງບໍລິສັດ ໂຕໂຢຕ້າ ມໍເຕີ້ ປະເທດໄທ ຈໍາກັດ ໄດ້ມອບເງິນຄ່າກໍ່ສ້າງງວດທໍາອິດ ຈໍານວນ 600,000 ບາດ (141,000,000 ບາດ) ໃຫ້ແກ່ ທ່ານມົນທອງ ລຽນຕິຄຸນ ຫົວໜ້າພະແນກສຶກສາ ແລະກິລາແຂວງຫົວພັນ ເພື່ອໃຊ້ເບີກຈ່າຍໃຫ້ແກ່ຜູ້ຮັບເໝົາຕາມສົມຄວນ ໂດຍກໍານົດໃຫ້ແລ້ວໂຄງການພາຍໃນເດືອນສິງຫາ 2017 ນີ້.


ກິດຈະກໍາໃນຄັ້ງນີ້ ຖືເປັນອີກໜຶ່ງກິດຈະກໍາດີໆທີ່ ທາງໂຕໂຢຕ້າ ໄດ້ມີສ່ວນຮ່ວມມາໂດຍຕະຫຼອດ ເພື່ອສະໜັບສະໜູນການສຶກສາຂອງເຍົາວະຊົນລາວ. ນອກຈາກນີ້ ໂຕໂຢຕ້າຈະຍັງສືບຕໍ່ສະໜັບສະໜູນ ແລະ ດໍາເນີນກິດຈະກໍາຕ່າງໆທີ່ມີປະໂຫຍດຕໍ່ສັງຄົມ, ການສຶກສາ ລວມເຖິງປະເພນີ ວັດທະນະທໍາຕ່າງໆຂອງລາວ ຕໍ່ໄປໃນອະນາຄົດ.