ໃນວັນທີ 28 ຕຸລາ 2015 ທີ່ຜ່ານມາ ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ຮ່ວມກັບ ຕົວແທນຈຳໜ່າຍໂຕໂຍຕ້າຢ່າງເປັນທາງການໃນ ສປປ ລາວ ຈັດງານຄອນເສີດການກຸສົນ ໂຕໂຍຕ້າ     ຄາສສິກ ຂື້ນເປັນຄັ້ງທຳອິດ ທີ່ ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ ໂດຍໄດ້ຮັບກຽດຈາກ ພະນະທ່ານ ດຣ. ນາງ ແກ້ວສາຍໃຈ ໄຊຍະສອນ ພັນລະຍາ ພະນະທ່ານ ຈູມມະລີ ໄຊຍະສອນ ປະທານປະເທດແຫ່ງ ສປປ ລາວ ເປັນປະທານກິດຕິມະສັກ ພ້ອມດ້ວຍບັນດາທ່ານລັດຖະມົນຕີວ່າການ, ເຈົ້າຄອງນະຄອນຫຼວງວຽງຈັນ, ລັດຖະມົນຕີຊ່ວຍວ່າການ, ພັນລະຍາການນຳ, ບັນດານັກການທູດ ແລະ ອົງການຈັດຕັ້ງສາກົນປະຈຳ ສປປ ລາວ, ທ່ານ ຄຽວອິຈິ ທານາດະ ປະທານ ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ພ້ອມດ້ວຍຜູ້ບໍລິຫານລະດັບສູງຈາກ ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ແລະ ຕົວແທນຈຳໜ່າຍໂຕໂຍຕ້າຢ່າງເປັນທາງການໃນ ສປປ ລາວ ອີກທັງຍັງມີແຂກຜູ້ມີກຽດເຂົ້າຮ່ວມຢ່າງຫຼວງຫຼາຍ

ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ໄດ້ມອບລາຍໄດ້ຈາກການຈັດງານ Toyota Classics Charity Concert 2015  ເປັນຈຳນວນ 230.000.000 ກີບ ເພື່ອສົມທົບທຶນກິດຈະກໍາການກຸສົນໃນ ສປປ ລາວ

ຄອນເສີດການກຸສົນໃນຄັ້ງນີ້ຈັດຂື້ນເພື່ອສະເຫຼີມສະຫຼອງ 40 ປີ ວັນສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສະເຫຼີມສະຫຼອງ 60 ປີ ວັນສ້າງຕັ້ງພັກປະຊາຊົນປະຕິວັດລາວ ແລະ ເພື່ອໃຊ້ດົນຕີຄາສສິກເປັນພະລັງຂັບເຄື່ອນຄວາມສຸກສູ່ສັງຄົມ. ເພື່ອສົ່ງເສີມໃຫ້ປະຊາຊົນໃນ ສປປ ລາວ ມີໂອກາດຮັບຊົມ ແລະ ຮັບຟັງການສະແດງຂອງວົງດົນຕີລະດັບໂລກ  ດັ່ງນັ້ນ ໂຕໂຍຕ້າຈື່ງໄດ້ເຊີນນັກຮຽນໂຮງຮຽນສິລະປະແຫ່ງຊາດ ເຂົ້າຮ່ວມເບິ່ງຄອນເສີດໃນວັນດັ່ງກ່າວຟຣີ ເພື່ອເປັນປະໂຫຍດກັບນ້ອງເຍົາວະຊົນອີກດ້ວຍ