ໃນ​ວັນ​ທີ 29 ກັນຍາ 2015 ບໍລິສັດ ​ໂຕ​ໂຍຕ້າ ມໍ​ເຕີ້ ປະ​ເທດ​ໄທ ຈຳກັດ ຮ່ວມ​ກັບ​ຕົວ​ແທນ​ ຈຳໜ່າຍ​ໂຕ​ໂຍຕ້າ​ຢ່າງ​ເປັນ​ທາງ​ການ​ໃນ ສປປ ລາວ ​ໄດ້ຈັດ​ງານ​ຖະ​ແຫ​ລງຂ່າວ​ຄອນ​ເສີດ​ການ​ກຸສົນ ​​ໂຕໂຍຕ້າ ຄາ​ສສິກ ຄັ້ງ​ທຳ​ອິດ​ໃນ​ ສປປ ລາວ ​ໂດຍ​ໄດ້​ຮັບ​ກຽດ​ເຂົ້າ​ຮ່ວມ​ຈາກ​ຜູ້​ບໍລິຫານ​ລະດັບ​ສູງ​ຂອງ​ໂຕ​ໂຍຕ້າ ​ໄດ້​ແກ່​ ທ່ານ​ປະກອນ ວົງ​ວິທະ​ຍາ​ພິຣົມ ປະທານຝ່າ​ຍປະຕິບັດ​ການ​ສຳນັກງານ​ພູ​ມິ​ພາກ​ແມ່ນ້ຳຂອງ ບໍລິສັດ​ ໂຕ​ໂຍຕ້າ ມໍ​ເຕີ້ ປະ​ເທດ​ໄທ ຈຳກັດ ​ແລະ​ຜູ້​ບໍລິຫານ​ລະດັບ​ສູງ​ຂອງ ບໍລິສັດ​ ໂຕ​ໂຍຕ້າບໍລິການ ຈຳກັດ, ບໍລິສັດ ​ໂຕ​ໂຍຕ້າ ລາວ​ທານີ ຈຳກັດ, ບໍລິສັດ ​ໂຕ​ໂຍຕ້າ ລາວ​ສະຫວັນ ຈຳກັດ, ບໍລິສັດ​ໂຕ​ໂຍຕ້າ ຈຳປາ ຈຳກັດ, ບໍລິສັດ ​ໂຕ​ໂຍຕ້າ ພາກ​ໃຕ້​ ຈຳກັດ ​ແລະ ບໍລິສັດ ​ໂຕ​ໂຍຕ້າ​ ເມືອງ​ຫລວງ​ຈຳກັດ ນອກຈາກ​ນີ້ຍັງ​ໄດ້​ຮັບ​ກຽດຈາກ ທ່ານ ບົວ​ເງິນ ຊາ​ພູ​ວົງ ລັດຖະມົນຕີ​ຊ່ວຍ​ວ່າການ​ກະຊວງ​ຖະ​ແຫ​ລງຂ່າວວັດທະນາ​ທຳ ​ແລະ​ທ່ອງ​ທ່ຽວ, ທ່ານ ຄຳ​ພວງ ອິນ​ທະລັງ​ສີ ຫົວໜ້າກົມ​ສິນລະ​ປະການ​ສະ​ແດງ, ທ່ານ ອິນ​ປອນ ນະຄອນ​ສີ ຮອງ​ຫົວໜ້າກົມ​ສື່ສານ​ມວນ​ຊົນ ​ແລະ​ ທ່ານ​ມະນີ​ພອນ ຫລວງ​ສີ​ສົງຄາມ ຮອງ​ຫົວໜ້າກົມ​ຮ່ວມ​ມື​ສາກົນ ​ກໍ່​ໄດ້ເຂົ້າ​ຮ່ວມ​ງານ​ດັ່ງກ່າວ

ຄອນ​ເສີດ​ການ​ກຸສົນ​ໂຕ​ໂຍຕ້າ ຄາ​ສສິກ ຈັດຂຶ້ນ​ເພື່ອ​ໃຫ້​ດົນຕີ​ມີ​ສ່ວນ​ໃນ​ການ​ສ້າງ​ຄວາມ​ສຸກ ​ແລະ​ສ້າງສັນ​ຮອຍ​ຍິ້ມ​ສູ່​ສັງຄົມ​ໃນ​ ສປປ.ລາວ ຜ່ານ​ວົງ ບູດາ​ເປສ ​ໂອ​ເປ​ເຣດຕາ ​ແລະ​ມິ​ວສິກ​​​ໂຄເທຍ​ເຕີ້ ຈາກ​ປະ​ເທດຮັງ​ກາລີ ​ເຊິ່ງ​ເປັນ​ວົງ​ດົນຕີ​ລະດັບ​ໂລກ​​ໂດຍ​ລາຍ​ໄດ້​ຈາກ​ການ​ຈຳໜ່າຍບັດ ບໍ່ຫັກ​ຄ່າ​ໃຊ້​ຈ່າຍ​ເພື່ອ​ສະໜັບສະໜູນກິດຈະ​ກຳດົນຕີ​ໃນ ສປປ.ລາວ ​ເຊິ່ງການສະ​ແດງ​ຄອນ​ເສີດ​ຄັ້ງ​ນີ້​ຢູ່​ພາຍ​ໃຕ້​ການ​ອຳນວຍ​ເພັງ​ຂອງ​ມາ​ເອສ​ໂຕຣ Laszlo Maklary ຜູ້​ຊະນະ​ລາງວັນ Artisjus ​ແລະ​ສິນລະປິນ​ຊົງ​ກຽດ​ໃຫ້​ຮັງ​ກາລີ (Honored Artist of Hungary) ທີ່​ໂຮງ​ແຮມ​ລາວ​ພາ​ຊາ, ນະຄອນຫລວງ​ວຽງຈັນ ສປປ ລາວ

ຈາກ​ການ​ດຳ​ເນີນ​ທຸລະ​ກິດ​ໃນ ສປປ ລາວ ​ເປັນ​ເວລາ​ດົນ ​ໂຕ​ໂຍຕ້າ ຫວັງ​ທີ່​ຈະ​ມີ​ສ່ວນ​ຮ່ວມ​ ສະໜັບສະໜູນການ​ພັດທະນາ​ປະ​ເທດ ​ແລະ​ບຸກຄະລາ​ກອນ​ຂອງ​ລາວ​ໂດຍ​ບໍ່ພຽງຜ່ານ​​ແຕ່ເລື່ອງລົດຍົນ​ທີ່​ມີ​ປະສິດ​ຕິ​ພາບ​ທີ່ດີ​ຂຶ້ນ​ເທົ່າ​ນັ້ນ ​ແຕ່ຍັງ​ຜ່ານ​ໂຄງການ​ຄວາມ​ຮັບຜິດຊອບ​ຕໍ່ສັງຄົມ​ ດັ່ງ​ນັ້ນ​ທາງ​ບໍລິສັດຈຶ່ງ​ເລັງ​ເຫັນ​ວ່າ: ​ໂຕ​ໂຍຕ້າ ຄາ​ສສິກ ​ເປັນ​ອີກໜຶ່ງວິທີ​​ໃນ​ການ​ຕອບ​ແທນ​ຄົນ​ໃນ ສປປ​ ລາວ ​ໂຕ​​ໂຍຕ້າ​ມີ​ຄວາມ​ມຸ້ງໝັ້ນ ຮ່ວມ​ເປັນ​ສ່ວນໜຶ່ງ​ໃນ​ການ​ສ້າງ​ຄວາມສຸກ ​ແລະ​ຮອຍ​ຍິ້ມ ສູ່​ສັງຄົມ​ໃນ​ ສປປ ລາວ ພາຍ​ໃຕ້​ສະ​ໂລ​ແກນ “​ໂຕ​ໂຍຕ້າ ​ໄປ​ໃສໄປ​ນຳ​ກັນ” ດ້ວຍ​ການ​ເປັນ​ອົງ​ກອນ​ທີ່​ດີ​ ມີ​ຈິດ​ສຳນຶກ​ຮັບຜິດຊອບ ​ແລະ​ຮ່ວມພັດທະນາ​ສັງຄົມ​ຂອງ ສປປ ລາວ ​ໂດຍໜຶ່ງ​ໃນ​ຄວາມ​ມຸ້ງໝັ້ນ ​ແລະ​ຕັ້ງ​ໃຈ​ຂອງ​ໂຕ​ໂຍຕ້າ ຄື​ການ​ສະໜັບສະໜູນທາງ​ດ້ານ​ການ​ສຶກສາ ​ແລະ​ຍົກ​ລະດັບ​ຄຸນ​ນະພາ​ບຊີວິດ ​ໃຫ້​ແກ່​ຜູ້​ຂາດ​ແຄນ​ໂອກາດ ​ເຊິ່ງ​ໃນ​ປີ​ນີ້ ບໍລິສັດໄດ້​ນຳ​ຄອນ​ເສີດການ​ກຸສົນ ​ໂຕ​ໂຍຕ້າ ຄາ​ສສິກ ມາ​ຈັດ​ສະ​ແດງ​ໃນ ສປປ ລາວ ​ໂດຍ​ມີ​ວັດ​ຖຸປະສົງ​ເພື່ອ​ສົ່ງ​ເສີມ​ໃຫ້​ປະຊາຊົນ​ໃນ ສປປ ລາວ ມີ​ໂອ​ກາດ​ຮັບ​ຊົມ​ແລ​ະຮັບ​ຟັງ​ການສະ​ແດງ​ຂອງ​ວົງ​ດົນຕີ​ລະດັບ​ໂລກ ກໍ​ໃຫ້​ເກີດ​ການ​ມີ​ສ່ວນ​ຮ່ວມ​ຂອງ​ຄົນ​ໃນ ສປປ ລາວ​ ໃນ​ການ​ຊື້​ບັດຊົມ​ຄອນ​ເສີດ​ການ​ກຸສົນເພື່ອ​ສົມທົບ​ທຶນ ລາຍ​ໄດ້​ຈາກ​ການຈຳໜ່າຍບັດ​ໂດຍ​ບໍ່ຫັກ​ຄ່າ​ໃຊ້​ຈ່າຍ ​ເພື່ອ​ສະໜັບສະໜູນກິດຈະກຳ​ດີໆ​ໃນ​ ສປປ ລາວ

ການສະ​ແດງ​ຄອນ​ເສີດ ​ໂຕ​ໂຍຕ້າ ຄາ​ສສິກ​ຄັ້ງ​ນີ້​ ໂດ​ຍ ວົງບູດາ​ເປສ ​ໂອ​ເປ​ເຣດຕ້າ ​ແລະ​ມິ​ວສິກ​​​ໂຄເທຍ​ເຕີ້ ​​ນຳ​ໂດຍ​ຜູ້​ອຳນວຍ​ເພງ​ມາ​ເອສ​ໂຕຣ Laszlo Maklary ຜູ້​ຊະນະ​ລາງວັນ Artisjus ​ແລະ​ສິນລະປິນ​ຊົງ​ກຽດ​ໃຫ້​ຮັງ​ກາລີ (Honored Artist of Hungary) ຮ່ວມ​ກັບສິນລະປິນຂັບ​ຮ້ອງ​ຫລັກ​ໄດ້​ແກ່ Anita Lukács, Zsolt Vadász Gergely Boncsér, Mónika Fischl, Szilvi Szendy ​ແລະ Dávid Szabó ​ເຊິ່ງ​ໄດ້​ຈັດ​ສະ​ແດງ​ໃນ​ຫລາຍ​ປະ​ເທດ​ທັງ​ໃນ​ທະວີບຢູ​ໂຣບ ​ແລະ​ເອ​ເຊຍ ​ໃນ​ປີ 2011 ວົງສາ​ມາດ​ເອົາ​ຊະນະ​ຄະນະ​ລະຄອນ​ລະດັບ​ໂລກ​ອື່ນໆ ​ແລະ​ຊິງ​ເອົາ​ສິດ​ໃນ​ການສະ​ແດງ ລະຄອນ​ເພງ “​​ໂສມ​ງາມ ກັບ​ເຈົ້າ​ຊາ​ຍອາ​ສູນ” ​ໃນ​ປະ​ເທດ​ທີ່​​ເວົ້າ​ພາສາ​ເຢຍລະ​ມັນ ​ແຖມ​ຍັງ​ໄດ້​ຮັບ​ລາງວັນ​ອັນ​ຊົງ​ກຽດ ຊຸບ​ເປີ​ແບ​ຣນ (Super Brand) ​ໃນ​ສາຂາ​ວົງດີ​ເດັ່ນ​ຕິດຕໍ່ກັນ​ 3ປີ​ຊ້ອນ​ທີ່​ຜ່ານ​ມາ

ວົງບູດາ​ເປສ ​ໂອ​ເປ​ເຣດຕາ ​ແລະ​ມິ​ວສິກ​​​ໂຄເທຍ​ເຕີ້ ຈະ​ສະ​ແດງ​ຜົນງານ​ປະສົມ​ປະສານ​ທັງ​ຈາກ​ຝັ່ງ​ລະຄອນ​ເພງ ​ແລະ ​ໂອ​ເປ​ເຣດຕາ ​ເຊິ່ງ​ເລືອກຄັດ​ສັນ ບົດ​ປະພັນ​ຈາກ​ລະຄອນ​ເພງ ທີ່​ໄດ້​ຮັບ​ຄວາມ​ນິຍົມ​ຈາກ​ຜູ້​ຊົມ​ເຊັ່ນ: “​ເວສທ໌​ ໄຊ​ດ໌ ສຕໍ​ຣີ” ​ແລະ “​ແຟນທ່ອມ ອັອຟ ດິ ​ໂອ​ເປ​ຣ່າ” ສ່ວນ​ຜົນງານ​ ໂອ​ເປ​ເຣດຕານັ້ນ ​ເລືອກ​ສັນ​ມາ​ຈາກ “​ເດິ ​ແບ​ທ” ​ໂດຍ​ໂຍຮັນ ສ​ເຕົຣາທ໌ ທີ່​ 2 “ຢິບ​ຊີ ​ເລີບ​ຟ” “​ເດິ ​ແລນ​ດ໌ ອອຟ ສ​ໄມ​ລ໌” ​ແລະ “​ເດິ ​ເມີຣີ່ ວິ​ໂດ” ​ໂດຍ ຟຣານຊ໌ ​ເລ​ຮາຣ໌ “​ເດິ ​ເຄົາ​ທ໌ເລ​ສ ມາ​ຣິທຊ່າ” ​ແລະ “​ເດິ ຢິບ​ຊີ ພຣິສ​ເຊ​ສ” ​ໂດຍ​ເອມ​ເມີ​ຣິຊ ຄາລ​ໃນ ຍິ່ງ​ໄປ​ກວ່າ​ນັ້ນ ​ໃນ​ບາງ​ປະ​ເທດ​ຈະ​ມີ​ການສະ​ແດງ​ຈາກ​ສິນ​ລະ​ປິນທ້ອງ​ຖິ່ນ​ຮ່ວ​ມດ້ວຍ

ຄອນ​ເສີດ​ການ​ກຸສົນ ​ໂຕ​ໂຍຕ້າ ຄາ​ສສິກ ຈັດ​ຄັ້ງທຳອິດໃນ​ປີ ຄ.ສ 1990 ດ້ວຍ​ເຈດ​ຕະນາ​ລົມ​ຂອງ​ໂຕ​ໂຍຕ້າ​​ໃນ​ການ​ເຜີຍ​ແຜ່​ວັດທະນາ​ທຳ​ດົນຕີ​ຄາ​ສສິກ​ອັນ​ເປັນ​ສິນລະປະ​ທາງ​ດົນຕີ​ຊັ້ນ​ສູງ​ໃຫ້​ແກ່​ປະ​ເທດ​ໃນ​ພູມິ​ພາກ​ເອ​ເຊຍ ນຳ​ສະ​ເໜີການສະ​ແດງ​ຈາກ​ວົງ​ດົນ​ຕີ​ລະດັບ​ໂລກ ສົ່ງ​ເສີ​ມ​ໃຫ້ປະຊາຊົນ​ເກີ​ດຄວາມ​ປະ​ທັບ​ໃຈ ​ແລະ ມ່ວນ​​ໄປ​ນຳ​ການ​ຟັງ​ດົນ​ຕີຄາ​ສສິກ ລວມ​ເຖິງ​ການ​ນຳ​ລາຍ​ໄດ້​ຈາກ​ການຈຳໜ່າຍບັດ​ມອບ​ໃຫ້​ແກ່​ອົງ​ກອນສາທາລະນະ​ກຸສົນ ​ໂດຍ​ຈັດ​ສະ​ແດງ​ມາ​ແລ້ວ​ທັງໝົດບໍ່ຕ່ຳ​ກວ່າ 184ຄັ້ງ ມີ​ຜູ້​ເຂົ້າ​ຮ່ວມ​ຮັບ​ຟັງ​ຄອນ​ເສີດ​ທັງໝົດຫລາຍ​ກ່ວາ 2​ແສນ​ຄົນ ​ໃນ​ປະ​ເທດ​ແຖບ​ເອ​ເຊຍ​ໄດ້​ແກ່ ປະ​ເທດ​ສິງກະ​ໂປ ມາ​ເລ​ເຊຍ ບລູ​ໄນ ອິນ​ໂດ​ເນ​ເຊຍ ​ໄຕ້​ຫວັນ ຟິລິປິ​ນ ຮ່ອງ​ກົງ ຫວຽດນາມ ​ເກົາຫລີ​ໃຕ້ ຈີນ ອິນ​ເດຍ ​ແລະ​ໄທ

ໃນ​ປີ​ນີ້​ຄອນ​ເສີດ​ການ​ກຸສົນ ​ໂຕ​ໂຍຕ້າ​ຄາ​ສສິກ ຈັດການ​ສະ​ແດງ​ທັງໝົດ 7ປະ​ເທດ ​ໃນ​ພູ​ມິ​ພາກ​ເອ​ເຊຍ​ໄດ້​ແກ່: ບລູ​ໄນ ກຳປູ​ເຈຍ ມາ​ເລ​ເຊຍ ​ໄທ ຟິລິປິ​ນ ຫວຽດນາມ ​ແລະ ສປປ ລາວ

ທ່ານ ປະກອນ ວົງ​ວິທະ​ຍາ​ພິຣົມ ປະທານ​ຝ່າຍ​ປະຕິບັດ​ການ​ສຳນັກ​ເຂດ​ພູມິ​ພາກ​ແມ່ນ້ຳຂອງ ​ໄດ້ກ່າວ​ປິດ​ທ້າຍ​ວ່າ “ສຳລັບ​ເຫດ​ຜົນ​ທີ່​ເຮົາ​ເລືອກ​ຈະ​ຈັດ​ຄອນ​ເສີດ ​ໂຕ​ໂຍຕ້າ ຄາ​ສສິກ​ທີ່ ສປປ ລາວ ​ໃນ​ປີ​ນີ້​ເຮົາ​ມີ​ໂອກາດ​ພິ​ເສດທີ່​ສຳຄັນ​ຄືການສະ​ເຫ​ລີ​ມສະຫລອງວັນ​ສ້າງ​ຕັ້ງ​ພັກ​ປະຊາ​ຊົນ​ປະຕິວັດ​ລາວ ຄົບຮອບ 60ປີ ​ແລະ ສະ​ເຫລີ​ມສະຫລອງ​ວັນ​ສ້າງ​ຕັ້ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ​ຄົບຮອບ 40ປີ ​ໂດຍ​ມີ​ວັດຖຸ​ປະສົງ​ເພື່ອ​ໃຊ້​ດົນຕີຄາ​ສສິກ​ເປັນ​ພະລັງ​ຂັບ​ເຄື່ອນ​ຄວາມສຸກ​ສູ່​ສັງຄົມ ອີ​ກທັງ​ຍັງ​ເປັນ​ການ​ສົ່ງ​ເສີມ​ໃຫ້​ປະຊາຊົນ​ໄດ້​ມີ​ໂອ​ກາດ​ຮັບ​ຊົມ​ແລະ​ຮັບ​ຟັງ​ການສະ​ແດງ​ຂອງວົງດຸລິ​ຍານ​ລະດັບ​ໂລກ​ອີກ​ດ້ວຍ ສຳ​ລັບ​ຜູ້​ທີ່​ສົນ​ໃຈ ​ແລະ​ຢາກ​ຮ່ວມ​ສົມທົບ​ທຶນ ສາມາດ​ຕິດຕໍ່ຊື້​ບັດ​ໄດ້​ທີ່​ຕົວ​ແທນ​ຈຳໜ່າຍ​ໂຕ​ໂຍຕ້າ​ຢ່າງ​ເປັນ​ທາງ​ການ​ທົ່ວ​ປະ​ເທດ​ ​ໂດຍ​ລາຄາ​ບັດ​ຈະ​ແບ່ງ​ອອກ​ເປັນ​ລາຄາ 125,000ກີບ, 200,000ກີບ, 250,000ກີບ ທັງ​ນີ້​ລາຍ​ໄດ້​ທັງໝົດບໍ່ຫັກ​ຄ່າ​​ໃຊ້​ຈ່າຍ​ຈະ​ມອບ​ເພື່ອ​ສະໜັບສະໜູນກິດຈະກຳ​ດົນຕີໃນ ​ສປປ ລາວ​ຕໍ່​ໄປ ຂ້ອຍ​ຫວັງ​ເປັນ​ຢ່າງ​ຍິ່ງ​ວ່າ ການຈັດ​ຄອນ​ເສີດ​ການ​ກຸສົນ ​ໂຕ​ໂຍຕ້າ​ຄາ​ສສິກ​ໃນ​ຄັ້ງ​ນີ້ ຈະ​ເປັນ​ການ​ສົ່ງ​ມອບ​ຄວາມສຸກ​ສູ່​ສັງຄົມ​ຂອງ​ ສ​ປປ ລາວ ຈາກ​ດົນຕີຄາ​ສສິກ ​ເປັນ​ການ​ສ້າງ​ຮອຍ​ຍິ້ມ​ໃຫ້​ເກີດ​ຂຶ້ນ​ກັບ​ປະຊາຊົນ​ໃນ ສປປ ລາວ”.