ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ໄດ້ຮ່ວມໂດຍສະເດັດພຣະຣາຊກຸສົນກະຖິນພຣະຣາຊ ທານປະຈຳປີ 2017 ທີ່ ວັດພະເຈົ້າສິງຄຳໄຊຍະຣາມ, ເມືອງຫລ້າ, ແຂວງອຸດົມໄຊ, ສປປ ລາວ.


ວັນທີ 1-2 ພະຈິກ 2017 ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ນຳໂດຍ ທ່ານ ປະກອນ ວົງວິທະຍາພິຣົມ, ປະທານຝ່າຍປະຕິບັດການສາຍງານຢ່ອຍເຂດພູມິພາກແມ່ນ້ຳຂອງ 1 ພ້ອມດ້ວຍ ສະມາຄົມມິດຕະພາບໄທ-ລາວ, ສະມາຄົມມິດຕະພາບລາວ-ໄທ ແລະພາກສ່ວນທີ່ກ່ຽວຂ້ອງພາຍໃນ ແຂວງອຸດົມໄຊ ໄດ້ຮ່ວມກັນຈັດຕັ້ງ ບຸນກະຖິນມະຫາສາມັກຄີພະຣາຊະທານຈາກເຈົ້າມະຫາຊີວິດແຫ່ງຣາຊະອານາຈັກໄທ ພະບາດສົມເດັດມະຫາວະຊິຣາລົງກອນ ບໍດິນທໍຣະເທບວະຣາງກູນ ທີ່ ວັດພະເຈົ້າສິງຄຳໄຊຍະຣາມ, ເມືອງຫລ້າ, ແຂວງອຸດົມໄຊ, ສປປ ລາວ.


ໂດຍທາງຝ່າຍປະຕິບັດການພູມິພາກແມ່ນ້ຳຂອງ, ສຳນັກງານພູມີພາກແມ່ນ້ຳຂອງ ບໍລິສັດ ໂຕໂຍຕ້າ  ມໍເຕີ້ ປະເທດໄທ ຈຳກັດ ຮ່ວມກັບຕົວແທນຈຳໜ່າຍໂຕໂຍຕ້າຢ່າງເປັນທາງການທັງ 6 ແຫ່ງ ຄື :  ໂຕໂຍຕ້າລາວທານີ, ລາວໂຕໂຢຕ້າບໍລິການ, ໂຕໂຍຕ້າລາວສະຫວັນ, ໂຕໂຍຕ້າຈຳປາ, ໂຕໂຍຕ້າເມືອງຫຼວງ, ລາວໂຕໂຢຕ້າພາກໃຕ້ ແລະ ພະນັກງານໂຕໂຍຕ້າຮ່ວມຖະຫວາຍເງິນສົມທົບເປັນຈຳນວນເງິນ 67,350,000 ກີບ ( 269,400 ບາດ ) ເພື່ອນຳໃຊ້ເປັນທຶນໃນການປູກະເບື້ອງໂບດພາຍໃນວັດ.ໂດຍມີ ຄູບາບຸນແພງ ສີລາວັນ ເຈົ້າອາວາດວັດພະເຈົ້າສິງຄຳໄຊຍະຮາມ ເປັນຜູ້ຮັບມອບໃນຄັ້ງນີ້ ນອກຈາກນີ້ທາງບໍລິສັດຍັງໄດ້ມອບເງິນສົດອີກມູນຄ່າ 100,000,000 ກີບ ( 400,000 ບາດ ) ເພື່ອນຳໃຊ້ເປັນທຶນໃນການກໍ່ສ້າງອາຄານພັກຄູ ທີ່ໂຮງຮຽນມັດທະຍົມຕົ້ນ ບ້ານຕາດມ່ວນ, ເມືອງຫລ້າ, ແຂວງອຸດົມໄຊ ເຊິ່ງປະຊາຊົນສ່ວນຫລາຍເປັນຊົນເຜົ່າຂະມຸ. ພ້ອມທັ້ງເຄື່ອງກີລາ ມູນຄ່າ 1,500,000 ກີບ ລວມມູນຄ່າທັງໝົດ 168,850,000 ກີບ ( 675,400 ບາດ )


ເຊິ່ງກິດຈະກຳການຕັ້ງກອງບຸນກະຖິນມະຫາສາມັກຄີໃນຄັ້ງນີ້ ຖືເປັນອີກກິດຈະກຳໜຶ່ງທີ່ ບໍລິສັດມີສ່ວນຮ່ວມມາໂດຍຕະຫຼອດເພື່ອສືບທອດປະເພນີອັນດີງາມຂອງລາວ. ນອກຈາກນີ້ ໂຕໂຍຕ້າ ຈະຍັງຄົງສະໜັບສະໜູນແລະດຳເນີນກິດຈະກຳຕ່າງໆທີ່ມີປະໂຫຍດຕໍ່ສັງຄົມ, ການສຶກສາ ແລະ ປະເພນີວັດທະນະທຳຕ່າງໆຂອງລາວຕໍ່ໄປໃນອະນາຄົດ.