ທີ່ນະຄອນຫຼວງວຽງຈັນ - ວັນທີ 28 ເມສາ 2015 ນີ້, ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ໄດ້ຈັດໃຫ້ມີ ພິທີມອບ-ຮັບລາງວັນ ລະດັບປະເທດຈາກ ໂຄງການປະກວດແຕ້ມຮູບໃນຫົວຂໍ້ “ລົດໂຕໂຍຕ້າ ໃນຝັນຂອງຂ້ອຍ” ປະຈຳປີ 2015 ຂຶ້ນ ເພື່ອເປັນການສົ່ງເສີມ ການສຶກສາໃຫ້ກັບເຍົາວະຊົນລາວ ໂດຍການເຂົ້າຮ່ວມເປັນປະທານຂອງ ທ່ານ ຮອງສາດສະດາຈານ. ດຣ. ສີສະຫມອນ ສິດທິຣາດວົງສາ, ຫົວຫນ້າຫ້ອງການ, ກະຊວງສຶກສາທິການ ແລະ ກິລາ ແລະ ທ່ານ ປະກອນ ວົງວິທະຍາພິຣົມ, ປະທານ ຝ່າຍປະຕິບັດການ ສາຍງານຢ່ອຍ ເຂດພູມິພາກແມ່ນ້ຳຂອງ ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ພ້ອມດ້ວຍຕົວແທນຈຳຫນ່າຍໂຕໂຍຕ້າຢ່າງເປັນທາງການ ໃນ ສປປ ລາວ, ຄະນະກຳມະການຜູ້ຊົງວຸດທິ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໂຄງການປະກວດແຕ້ມຮູບໃນຫົວຂໍ້ “ລົດໂຕໂຍຕ້າ ໃນຝັນຂອງຂ້ອຍ” ແມ່ນໄດ້ຈັດຂຶ້ນເປັນຄັ້ງທີ 9 ໃນລະດັບສາກົນ ແລະ ໄດ້ຈັດຂຶ້ນເປັນຄັ້ງທີ 5 ໃນປະເທດລາວ ເຊິ່ງໃນປີ 2015 ນີ້ໄດ້ຈັດຂຶ້ນຢ່າງຍິ່ງໃຫຍ່ ດ້ວຍການເປີດກວ້າງການປະກວດຂຶ້ນທົ່ວປະເທດ ໂດຍໄດ້ຮັບຄວາມສົນໃຈຈາກເຍົາວະຊົນ ແລະພໍ່ແມ່ຜູ້ປົກຄອງເປັນຈຳນວນຫຼາຍ ແລະມີຍອດລວມຜູ້ສະໝັກທັງໝົດຈາກ 18 ແຂວງເຖິງ 4,047 ຄົນ. ໂດຍໄດ້ຮັບກຽດເປັນຄະນະກໍາມະການຈາກພາກສ່ວນ ກະຊວງສຶກສາທິການ ແລະ ກິລາ, ກະຊວງຖະແຫລງຂ່າວ ແລະ ວັດທະນະທຳ ແລະ ກົມວິຈິດສີນແຫ່ງຊາດ ເພື່ອມາຄັດເລືອກຮູບແຕ້ມຈົນໄດ້ຜູ້ຊະນະເລີດໃນແຕ່ລະປະເພດອາຍຸມາຮັບລາງວັນ ທັງເຈົ້າຂອງຮູບແຕ້ມແລະໂຮງຮຽນທີ່ສົ່ງເຂົ້າປະກວດ ລວມລາງວັນກວ່າ 84,000,000 ກີບ ດັ່ງໄດ້ຕິດຂັດມາພ້ອມນີ້.

ນອກຈາກນີ້, ຜົນງານຂອງຜູ້ທີ່ໄດ້ຮັບລາງວັນຊະນະເລີດອັນດັບທີ 1, 2, 3 ໃນແຕ່ລະປະເພດອາຍຸ ໄດ້ຖືກສົ່ງເຂົ້າຮ່ວມປະກວດ ໃນລະດັບໂລກທີ່ປະເທດຢີ່ປຸ່ນ ຊຶ່ງຈະໄດ້ປະກາດລາງວັນໃນຊ່ວງເດືອນພຶດສະພາ 2015 ນີ້. ຊຶ່ງໃນປີ 2014 ທີ່ຜ່ານມາ ເຍົາວະຊົນລາວ ທ້າວ ພອນປະເສີດ ແສງມະນີວົງ ນັກຮຽນຈາກ ໂຮງຮຽນ ມ.ສ ເພຍວັດ ກໍ່ໄດ້ຮັບລາງວັນຫລຽນເງິນ ໃນປະເພດອາຍຸ 12-15 ປີ ແລະໄດ້ເດີນທາງໄປຮັບລາງວັນແລະເຮັດກິດຈະກໍາພ້ອມຜູ້ປົກຄອງສອງທ່ານທີ່ປະເທດຍີ່ປຸ່ນ. ສ່ວນປີ 2015 ນີ້ ເຍົາວະຊົນລາວເຮົາ ຈະສາມາດຍາດ ມາໄດ້ລາງວັນໃດບໍ່ນັ້ນ ຂໍໃຫ້ພີ່ນ້ອງຊາວລາວເຮົາຊ່ວຍຮ່ວມສົ່ງແຮງໃຈເຊຍນ້ອງໆດ້ວຍ.

ທ່ານ ປະກອນ ວົງວິທະຍາພິຣົມ, ປະທານ ຝ່າຍປະຕິບັດການ ສາຍງານຢ່ອຍ ເຂດພູມິພາກແມ່ນ້ຳຂອງ ບໍລິສັດ ໂຕໂຍຕ້າ ມໍເຕີ້ ປະເທດໄທ ຈຳກັດ ກ່າວວ່າ “ໂຄງການນີ້ຖືເປັນຄວາມສຳເລັດອັນໃຫຍ່ຫຼວງຂອງ ໂຕໂຍຕ້າ ທີ່ໄດ້ມີໂອກາດນຳເອົາກິດຈະກຳ ເພື່ອສັງຄົມກໍ່ຄືກິດຈະກຳເພື່ອການສົ່ງເສີມການສຶກສາທາງດ້ານສີນລະປະມາເປີດໂອກາດໃຫ້ເຍົາວະຊົນລາວໄດ້ມີເວທີສະແດງ ຄວາມສາມາດ ແລະຫວັງເປັນຢ່າງຍິ່ງວ່າ ຕົວແທນເຍົາວະຊົນລາວຈະສາມາດຍາດລາງວັນໃດລາງວັນຫນຶ່ງມາໄດ້ເພື່ອເປັນການ ສ້າງຊື່ສຽງໃຫ້ກັບ ສປປ ລາວ ອີກຄັ້ງຫນຶ່ງ. ໂຕໂຍຕ້າ ຍັງຈະໄດ້ຈັດໃຫ້ມີກິດຈະກຳເພື່ອສະຫນັບສະຫນູນສັງຄົມລາວ ທັງທາງດ້ານການສຶກສາ ກິລາ ແລະ ວັດທະນະທຳ ຢ່າງຕໍ່ເນື່ອງ ພາຍໃຕ້ນະໂຍບາຍ “ໂຕໂຍຕ້າ ໄປໃສໄປນຳກັນ”

ນອກຈາກລາງວັນເງິນສົດແລ້ວ, ໃບຍ້ອງຍໍແລະຂັນລາງວັນ, ຜົນງານຂອງຜູ້ຊະນະເລີດລະດັບປະເທດທັງຫມົດ 9 ຮູບ ຍັງຈະຖືກສົ່ງເຂົ້າປະກວດໃນລະດັບສາກົນທີ່ປະເທດຍີ່ປຸ່ນ.ຖ້າຜົນງານຫາກຕິດອັນດັບ1ໃນ3 ກໍ່ຈະໄດ້ເດີນທາງໄປຮັບເອົາລາງວັນດ້ວຍຕົວເອງພ້ອມຜູ້ປົກຄອງທີ່ປະເທດຍີ່ປຸ່ນໃນເດືອນສິງຫາ 2015ນີ້ອີກດ້ວຍ.